Ана од Кавадарци, 28 годишната девојка која прва јавно проговори за ужасите од телеграф групата „Јавна соба“ и предизвика голем публицитет, во ново видео објавено на социјалните мрежи даде поддршка на измените на Кривичниот законик и воведувањето на новото кривично дело „Демнење“. Таа смета дека ова претставува само почеток на борбата за поголема заштита на жените од насилство и вознемирување.
-Сакам да ви кажам едно големо браво, на сите оние кои пред половина година го кренавте својот глас. Коментиравте, протестиравте и го споделувавте видеото и на тој начин успеавме да извршиме притисок, да проблемот кој постоел со години се реши. Еве дојде и тој ден. Навистина се чувствувам убаво дека тие измени во законот се направени и не опфаќаат сите нас, кажа Ана на видеото.
Објавувањето на нејзиното прво видео-сведоштво предизвика бура од реакции во јавноста, со што решавањето на овој проблем беше повод и за повеќе протести на граѓанските здруженија.
Инаку, Министерството за правда ги подготви, а Владата во вторникот ги усвои измените на Кривичниот законик каде што се имплементирани делови од Истанбулската конвенција, со која заштитата на жените од насилство и вознемирување се подига на високо ниво. Министерот Маричиќ на прес-конференција објави и дека се воведува ново кривично делото „Демнење“, со кое се предвидуваат затворски казни за вознемирување и закани преку интернет.
ПОПУЛАРНО НА ИНТЕРНЕТ...
