Министерот за надворешни работи, Бујар Османи, иницирал итно формирање на работна група која ќе испита евентуална закана за МНР по приведувањето на македонскиот дипломат во Србија, на барање на Ерменија.
Османи вели дека е крајно загрижен и вознемирен поради случајот со приведувањето во друга земја на вработен во Министерството за надворешни работи, поради потерница која ја побарала трета земја. Османи вели дека тоа не само што предизвикува непредвидливост во работата на дипломатијата, туку ја разнишува довербата и авторитетот на куќата.
Тој објави кои итни мерки досега се преземни:
„Прво, согласно законските можности, на приведениот вработен му е ставен работниот однос во мирување, и повлечен е од неговите задолженија во мисијата во ОБСЕ
Второ, пуштив итна процедура за формирање работна група која треба да изврши првична итна ревизија на состојбите со сертификатите и документацијата со цел да се утврди дали постои одредена иманентна закана за сигурноста и доверливоста на куќата, особено закана која е поврзана со предметниот случај. Трето, работната група ќе добие и задолжение да оствари и меѓуресорска соработка со правосудните служби и службите за безбедност, со цел да се подготви план за вонреден ветинг на дипломатијата; оваа работна група ќе треба да ја оформи и меѓуресорската Комисија која ќе ѝ биде предложена на Владата, која, пак, ќе треба да го спроведе вонредниот ветинг преку процесите на сертификација и дополнителна безбедносна проверка. Четврто, ќе побарам од сите раководни позиции, директори и раководители на сензитивни позиции,задолжително да ја поминат процедурата на најстрог ветинг, преку системот на НАТО сертификати. Овој процес планирам да го направам задолжителен и во системот на пополнување амбасадорски места“, појасни Османи.
Претходно беше објавено дека станува збор за македонскиот дипломат Миле Миленкоски, заменик-шеф на нашата мисија во ОБСЕ, кој е баран од ерменските власти. Тој бил приведен на 27 август при обидот да ја премине границата во Прешево за да влезе во Македонија.
„Македонскиот дипломат помогнал во бегството на ерменски државјанин, кој добил македонски пасош и кој е поврзан со криминалните активности со коридорот Север-Јур“, истакна Гор Абрахајман, советник на ерменскиот јавен обвинител.
Според ерменските безбедносни сили, како што јавуваат ерменските медиуми, во 2018 година тројца дипломати од Македонија, предводени од Миленкоски, му помогнале на поранешниот ерменски функционер да избега од земјата со приватен лет.
