Во интервју за емисијата „60 минути“, претседателот Доналд Трамп изјави дека ја смета „омразата“ помеѓу украинскиот претседател Володимир Зеленски и рускиот претседател Владимир Путин за една од главните пречки за решавање на војната во Украина. Трамп одговараше на прашања од Рос Даутат од „Си-Би-Ес њуз“ во врска со неговото ветување дека ќе стави крај на конфликтот – ветување што тој често го повторуваше за време на својата неодамнешна кампања, пренесува The Hill.
Трамп: Војната трае пет години бидејќи Путин и Зеленски се мразат еден со друг
На прашањето што го смета за најголема пречка за мир во војната која сега влегува во својата петта година, Трамп одговори: „Тоа беше омразата помеѓу Зеленски и Путин. Да бев јас претседател, оваа војна никогаш немаше да започне. Шансите за тоа беа нула. Но, таа сепак започна, а јас ја наследив. Верувам дека сме многу блиску до постигнување договор“.
Кога дополнително беше прашан дали има поголема доверба во едната или во другата страна, Трамп одби да даде директен одговор. „Би претпочитал да не кажам, но добро се согласувам и со двајцата. Верувам дека оваа војна ќе заврши, и тоа наскоро. А единствената причина поради која ќе заврши е – јас. Постои огромна омраза помеѓу претседателот Путин и претседателот Зеленски“, додаде тој.
„Зеленски покажа големо непочитување кон Русија“
Даутат потоа забележа дека чувствата на Зеленски се можеби разбирливи, со оглед на тоа што Русија изврши инвазија врз Украина. „Па, така е. Но, на нивната прва средба, беше покажано големо непочитување кон Русија. Затоа нема да кажам ништо“, одговори Трамп. „Да го кажеме тоа вака: за време на моите четири години немаше војна, и никогаш немаше ни да се случи, иако тоа беше нешто што Путин многу го посакуваше“.
„Украина ќе има малку поинаков облик“
Кога новинарот изрази надеж и очекување дека на крајот сè ќе заврши со слободна и независна Украина, Трамп навести дека земјата би можела да излезе од мировниот договор со променети граници. „Мислам дека тоа ќе се случи. Но, на крајот, исходот ќе биде… Украина со малку поинакви граници“, рече Трамп, отворено алудирајќи на територијални отстапки и прекројување на украинската територија во замена за мир.
Трамп ја обвини Украина за порастот на цените на горивата
Во последните месеци, Трамп ги обвини украинските напади врз руските рафинерии за порастот на цените на горивата, што создаде политички проблеми за републиканците пред неодамнешните избори на средината на мандатот. Се смета дека тоа придонесло за убедливата победа на демократите минатиот вторник.
Минатиот месец, Трамп на платформата „Truth Social“ објави дека двете земји се договориле за енергетско примирје, но набргу потоа, Русија изврши напад врз електрана во источна Украина.
Американскиот претседател, исто така, го бранеше договорот за дизел со Русија, тврдејќи дека тоа не ѝ направило никаква услуга на Москва, туку му помогнало на глобалниот енергетски пазар: „Не ги укинав санкциите за дизелот. Ѝ дозволив на Русија да го снабдува светот – а не нас – со илјадници и илјадници барели нафта и дизел кои беа потребни“.
Критики за договорот со Русија
Ваквите потези, како и намалувањето на притисокот врз Москва, наидоа на остри критики и од демократските и од републиканските законодавци. Републиканскиот сенатор Том Тилис од Северна Каролина го опиша договорот како „целосно неодговорен“.
Во интервју за „NBC News“, украинскиот претседател Зеленски даде остра оценка за постапките на Трамп кон Москва. „Ако Соединетите Држави го поддржат Путин… мислам, тоа е неверојатно, тоа е трагедија, тоа е историска грешка и голема трагедија“, изјави Зеленски./Извор:Makfax
