Жителите на станбениот комплекс „Варшавски“ во Киев пронајдоа необичен начин да се справат со неодамнешниот вечерен прекин на електричната енергија: наместо да останат во своите темни станови, вечерта ја поминаа во дворот, организирајќи скара на отворено.
Според украинските медиуми – повикувајќи се на снимки што се појавија на социјалните мрежи – десетици соседи се собраа во заедничкиот двор меѓу зградите. Тие поставија скара и маси, споделија храна и пијалаци, а времето го поминаа со музика и танц, додека нивните домови останаа во целосен мрак.
Скара и танц наместо темни станови
На снимките се гледаат жители, облечени во зимски јакни, како подготвуваат месо на импровизирана скара, додека во позадина се слушаат смеа и песна. Украинските медиуми пренесуваат дека, преку овој гест, жителите сакале да покажат меѓусебна поддршка и пркос пред секојдневието, кое сè повеќе е одбележано со повеќечасовни прекини во снабдувањето со електрична енергија.
Ваквите сцени стануваат сè почести во украинските градови, бидејќи температурите паѓаат, а животот во високите станбени згради – без греење, осветлување или топла вода – станува сè потежок./Извор:Makfax
