Франција повторно се соочи со масовни протести поради растечките трошоци за живот, цените на горивата и незадоволството од јавните услуги. Според француското Министерство за внатрешни работи, во саботните демонстрации учествувале околу 146.000 луѓе низ целата земја, од кои 46.000 во Париз. Синдикатите изнесоа повисоки процени, од околу 250.000 учесници на национално ниво.
Во Париз и Лион имало судири меѓу дел од демонстрантите и полицијата, која употребила солзавец. Властите распоредиле значителни безбедносни сили, додека организаторите продолжиле да бараат повисоки плати, подобри услови во образованието и мерки против поскапувањата.
Протестите започнале како незадоволство на ученици и студенти од состојбата во образовниот систем, но постепено прераснале во пошироко социјално движење. Новиот бран незадоволство се случува во чувствителен политички период, неколку месеци пред претседателските избори во Франција.
