Најновите податоци на Евростат покажуваат дека Северна Македонија е меѓу земјите кои бележат најголемо подобрување на куповната моќ на граѓаните во Европа. Иако според номиналната минимална плата земјата се наоѓа во долниот дел од европската ранг-листа, сликата значително се менува кога ќе се земе предвид реалната куповна моќ на платите.
Според пресметките врз основа на стандардот на куповна моќ (PPS), Македонија напредува од 24-то на 16-то место меѓу европските земји, што претставува скок од осум позиции најголем заедно со Романија. Овој показател значи дека минималната плата во Македонија овозможува купување повеќе производи и услуги отколку што покажува нејзината номинална вредност.
Дополнително, Македонија е земјата со најголемо зголемување на минималната плата во Европа во периодот од јануари до јули 2026 година. Минималната плата е зголемена за 6,9 проценти, што е највисок раст меѓу 29 анализирани европски земји. Во истиот период, само уште седум држави ги зголемиле минималните плати, додека во сите останати тие останале непроменети, и покрај растот на инфлацијата.
Токму затоа рангирањето според куповната моќ дава пообјективна слика за реалниот животен стандард. За разлика од номиналните износи, PPS ја зема предвид разликата во цените меѓу државите и покажува колку производи и услуги навистина може да си дозволи еден работник со минимална плата.
Податоците покажуваат дека Македонија според куповната моќ се наоѓа пред неколку земји членки на Европската Унија, меѓу кои Малта, Словачка, Унгарија и Чешка. Истовремено, Србија, Хрватска и Бугарија исто така бележат подобрување, но најголемиот скок го имаат токму Македонија и Романија.
Според куповната моќ Србија се искачува за пет места, како и Хрватска и Бугарија, кои напредуваат за три позиции.
Од друга страна, Естонија бележи најголем пад, спуштајќи се од 16. на 26. место, додека Летонија, Чешка и Кипар губат по четири позиции на ранг-листата според куповната моќ.
Анализата на Евростат покажува и уште еден важен тренд. Во услови кога инфлацијата во голем број европски земји ја намалува реалната вредност на платите, државите кои не ги усогласиле минималните примања бележат пад на куповната моќ. Најголем пример е Естонија, која губи десет позиции според рангирањето на куповната моќ, додека Летонија, Чешка и Кипар исто така бележат значително назадување.
Тоа покажува дека висината на минималната плата сама по себе не е доволен показател за животниот стандард. Поважно е колку реално може да се купи со тие примања, односно колку успешно растот на платите го следи растот на трошоците за живот.
Податоците на Евростат затоа упатуваат дека Македонија не само што има најголемо номинално зголемување на минималната плата во анализираниот период, туку и едно од најголемите подобрувања на реалната куповна моќ. Скокот од осум места на европската листа претставува показател дека растот на минималната плата има конкретен ефект врз можностите на граѓаните да ги задоволуваат своите секојдневни потреби.
Иако Македонија и понатаму останува под просекот на најразвиените европски економии според висината на минималната плата, најновите европски податоци покажуваат дека во споредба со многу други земји, минималните примања денес имаат поголема реална вредност отколку што покажува нивниот номинален износ. Тоа ја позиционира земјата меѓу најголемите добитници според куповната моќ во Европа во текот на 2026 година.
