Бројот на жртвите во рускиот напад врз Киев се искачи на 30 откако спасувачите извлекоа уште три тела од урнатините на станбена зграда во населбата Дарнички. Државната служба за вонредни состојби на Украина потврди зголемување на бројот на жртви, а спасувачките операции продолжуваат еден ден по разорниот напад, пишува „Украинска правда“.
Во ноќта помеѓу 1 и 2 јули, руските сили започнаа масовен комбиниран напад врз Украина користејќи дронови за напад и ракети од различни видови лансирани од воздух, копно и море. Украинската воздушна одбрана собори 524 од 570 воздушни цели, но 25 балистички ракети и 12 дронови за напад ја пробија одбраната и ги погодија нивните цели. Главната цел на нападот беше Киев, каде што до пладне на 2 јули беа потврдени 27 мртви и речиси 90 повредени.
Вчера, еден ден по нападот, урнатините на деветкатница во киевската населба Дарнички станаа симбол на страдање. Директниот удар го уништи централниот дел од зградата, претворајќи 64 станови во куп бетон, прашина и свиткан метал.
Спасувачките екипи успеаја да спасат 17 жители, од кои седум беа извлечени живи од урнатините. Службите за итни случаи, лекарите и кучињата трагачи работеа деноноќно, пребарувајќи ги остатоците од она што само неколку часа претходно беше нечиј дом.
Претседателот, Володимир Зеленски, го посети местото на нападот за да им оддаде почит на жртвите и да ја процени штетата. Службениците го информираа за катастрофалните последици од нападот, кој погоди повеќе од 130 локации во Киев, оштетувајќи 60 станбени згради, станица за брза помош, истражувачки институт и хотел./Извор:Makfax
