СДСМ обвинува дека Максим Димитриевски и партијата ЗНАМ се фатени во, како што го нарекуваат, „историски корупциски скандал“, при што најавуваат објавување на целосна документација поврзана со случајот.
„Фатени во историски корупциски скандал, со очајната реакција полна со лаги и празни обвинувања, ЗНАМ и Максим Димитриевски само го потврдија скандалот кој денеска го објави СДСМ“, се вели во соопштението.
СДСМ тврди дека наместо директен одговор на прашањата од јавноста, Димитриевски се обидел да се брани со „фермани“, при што партијата поставува конкретно прашање:
„Како тоа со купи-продај земјиште преку ноќ се печалат 350.000 евра?“
Во продолжение, СДСМ го обвинува Димитриевски за политичка недоследност:
„Како тоа ДУИ беше лоша партија против која Максим жестоко се бореше, но сега е партијата со која го договорил гласањето на ДУП-от? Што им ветил и каква услуга им должи сега? Му порачуваме да излезе и сам да каже затоа што ние ја знаеме вистината и ќе одиме до крај.“
Партијата ја отфрла критиката од ЗНАМ и ја нарекува „празна“ и „неспособна да го прикрие очигледниот конфликт на интереси и корупција“.
„Максим Димитриевски и ЗНАМ се партија која освен личните интереси и бизниси очигледно немаат друга улога во општеството. Не е ни чудо што тонат целосно и се сведоа на привезок на Мицкоски и ДПМНЕ.“
СДСМ го поврзува актуелниот случај со изборните ветувања на Димитриевски, обвинувајќи го за нивно целосно прекршување.
„Димитриевски со овој скандал си ги сруши единствените две ветувања дадени пред граѓаните, а тоа е дека ќе се бори за правда и ќе се бори против ДУИ. Димитриевски успеа политички да се самоуништи во желба да прибави корист за себе и тоа од фантастични 350.000 евра!“
Во последниот дел од соопштението, СДСМ упатува директни политички квалификации:
„Граѓаните на Куманово и целата јавност треба да знаат дека лажниот патриот Димитриевски, лажниот борец за правда кој ќе го праќаше ДУИ во опозиција, не е ништо друго туку криминална инсталација на ДПМНЕ која со епизодна улога во политиката. Ваквите политичари како Димитриевски, кои си ги погазуваат изборните ветувања за неполна година ќе бидат жестоко казнети.“
СДСМ завршува со најавата:
„СДСМ нема да молчи, за овој скандал имаме целосни информации и ќе ги објавиме до крај!“
