Градоначалникот Костадин Костадинов веднаш по преземањето на градоначалничката функција во октомври 2021 година се откажа од користење на службениот автомобил и постоечкиот беше продаден, а средствата наменети за изградба на Младински центар.
По една година подготовки, законски усогласувања и избор на најдобра локација, Младинскиот центар е во фаза на реализација во сутеренот на општинската зграда. Овој простор со години стоел неискористен, а имал потенцијал за ваква намена и се наоѓа на одлична локација, во центарот на градот.
По комплетното расчистување на просторот со површина од 400 метри квадратни, се вршат повеќе градежни зафати за адаптација и уредување на ѕидните и подните површини, преградни ѕидови, замена на водоводната и електричната инсталација. Овие зафати и новото ентериерско уредување треба да завршат за шест месеци, по што младите на Струмица ќе имаат модерен и повеќенаменски простор, кој досега го немаа.
Центарот ќе има амфитеатар, простор за организирање на конференции, предавања, изложби и други настани од рекреативен карактер, забава, средби, едукативни активности, подвижна платформа и пристап за лица со телесен инвалидитет. Вкупната инвестиција чини 7, 2 милиони денари, средства обезбедени од општинскиот буџет.
Со откажувањето од службеното возило и доброто менаџирање, струмичкиот градоначалник покажа како и време на криза може да се реализираат ветените проекти, но и да се задоволуваат барањата и потребите на граѓаните.
НАЈЧИТАНО НА ИНТЕРНЕТ...
