Oд утре (21.9.2022), поради градежни зафати и затворање на улицата Митрополит Теодосиј Гологанов, на потегот од кружниот тек до раскрсницата со булеварот Св. Климент Охридски, линиите 4А, 5 и 5А ќе сообраќаат по изменет режим од вообичаениот.
Затворањето на улицата ќе се одвива фазно.
Во првата фаза ќе бидат затворени само сообраќајните ленти во правец кон Ѓорче Петров. Во таа фаза возилата од центар, од улицата Димитрие Чуповски, ќе вртат лево по булеварот Св. Климент Охридски, кај Домот на печатот ќе вртат десно по улицата Св. Кирилј и Методиј, па на кружниот тек ќе продолжуваат по своите редовни траси.
При посочениот режим како привремена автобуска постојка во правец кон Ѓорче Петров ќе се користи просторот кај металните косини на тротоарот кај АМСМ.
Во втората фаза ќе бидат затворени сообраќајните ленти од кружниот тек кон централното градско подрачје.
Во таа фаза возилата од кружниот тек ќе продолжуваат по улицата Св. Кирил и Методиј, кај Домот на печатот ќе вртат лево по булеваротСв. Климент Охридски, потоа ќе продолжуваат по улицата Димитрие Чуповски по своите редовни траси.
При посочениот режим како привремена автобуска постојка ќе биде делот по раскрсницата со улицата Народен фронт, односно третиот канделабар по раскрсницата.
Изменетиот режим ќе важи во наредниот период сè до завршување на градежните работи на улицата која е дел од редовната траса на линиите 4А, 5 и 5А.
Од утре линијата 24 во реонот на Кисела Вода ќе сообраќа по изменет режим од вообичаениот поради затворањето на улицата Димо Хаџи Димов, од вкрстувањето со улицата Божидар Аџија до вкрстувањето со улицата Народни херои, на која ќе се изведуваат градежни работи.
Во правец од Центар кон Кисела Вода, од улицата 11 Октомври (постојката кај Зелениот пазар), возилата ќе продолжуваат право по улицата 11 Октомври по трасата на линијата 58, па по улицата Борис Трајковски до вкрстувањето со улицата Народни херои, потоа ќе вртат десно по улицата Народни херои, на семафорот ќе вртат лево и ќе продолжуваат по својата редовна траса.
На изменетата траса возилата ќе ги користат постојките од линијата 58.
Во обратен правец, од Кисела Вода кон Центар, возилата ќе сообраќаат по трасата на линијата 58 сè до крстосницата со булеварот Кочо Рацин, потоа ќе продолжуваат по својата редовна траса.
На изменетата траса возилата ќе ги користат постојките од линијата 58.
Изменетиот режим ќе важи во наредниот период сè до завршување на градежните работи на улиците што се дел од редовната траса на линијата 24.
