Премиерот Димитар Ковачевски во обраќањето во Собранието порача дека ова е последна борба помеѓу деструкцијата и песимизмот и отвореноста и оптимизмот, дека државата се гради секој ден, идентитетот и посебноста се почитува за навек, но се бранат секој ден, а тоа најдобро се прави кога сте дел од прогресот, од развојот, од модерното и напредното.
„Нема да дозволиме, како во време на режимот, државата да се претвори во изолирана, затворена и криминална енклава, во која политичката елита безмислосно краде и разграбува, а граѓаните бараат туѓи пасоши и работа во странство. Нема да дозволиме, како во минатото, државата и граѓаните да живеат во постојана неизвесност, немир и дилеми што ќе биде утре.
Нема да дозволиме државата да остане на опашката на Балканот, кога сите се движат напред, и покрај нивните проблеми од различен карактер. Нема да дозволиме, идентитетските прашања да се користат како муниција во борбата за фотелји, тендери, ослободување на криминален имот и лица и држење во заложништво на цели родени и неродени генерации.“ порача Ковачевски.
Цврсто ќе стоиме, додаде Ковачевски, на патот на заштита на македонскиот јазик, посебниот историски и културен идентитет на македонскиот народ преку негова рамноправност со европските народи.
