Претседателот на Владата, Зоран Заев се сретна со амбасадорот на Кралството Шпанија, Емилио Лоренцо Сера, кој го завршува својот мандат во нашата земја.
На средбата, беше изразено задоволство од посетата на премиерот Заев на Кралството Шпанија во мај годинава, оценувајќи ја како исклучително важна како прва посета на оваа земја на премиерско ниво, при што беа остварени средби со шпанскиот премиер Педро Санчез и со Пилар Лоп Куенка, претседателка на шпанскиот Сенат.
Премиерот Заев изразувајќи искрена почит и признание, на амбасадорот Лоренцо Сера му врачи благодарница за личниот посебен придонес на амбасадорот кон зајакнување на пријателството меѓу Република Северна Македонија и Кралството Шпанија како и за континуираната поддршка што Шпанија ја дава за напредокот на процесот на пристапување на нашата земја во Европската Унија.
Премиерот Заев оценувајќи ги како особено добри и пријателски односите со Кралството Шпанија, подвлече дека граѓаните на Северна Македонија засекогаш ќе ја паметат и почитуваат поддршката и вонредното ангажирање и гестот кој шпанскиот Сенат го направи со овозможување на електронско гласање на Протоколот за ратификација на членството на Северна Македонија во НАТО, во исклучително тешки услови на почетокот на пандемијата предизвикана од КОВИД-19.
Двајцата соговорници разменија мислења и за внатрешно – политичката состојба во земјата, согласувајќи се дека ќе продолжи соработката меѓу двете земји со цел јакнење и продлабочување на економски план и интензивирање на размената на искуства од областа на културата, образованието, судството.
НАЈЧИТАНО НА ИНТЕРНЕТ...
