Членовите на хеви метал бендот „Металика“ објавија дека ја одложуваат турнејата затоа што фронтменот Џејмс Хетфилд се пријавил на програма за зависници од алкохол.
„Металика“ во петокот објави на „Твитер“ дека им е „искрено жал“ за одложувањето на турнејата.
„Како што повеќето од вас веројатно знаете, нашиот брат Џејмс со години се бори против зависноста од алкохол. За жал, тој сега мора повторно да влезе во програмата за рехабилитација за да работи на своето закрепнување”, напишале неговите колеги Ларс Улрих, Кирк Хамет и Роберт Трухило.
Според веб-страницата на бендот, требало да се одржат осум концерти помеѓу 17 октомври и 2 ноември: шест во Австралија и два во Нов Зеланд.
„Металика“ изјави дека на фановите кои купиле билети ќе им бидат вратени парите и дека групата планира да се врати во Австралија и Нов Зеланд „кога ќе дозволат здравјето и распоредот“.
Сите членови на групата се во педесеттите години.
Нивниот петти албум „Металика“ од 1991 година се продаде во 30 милиони примероци.
НАЈЧИТАНО НА ИНТЕРНЕТ...
