Првите сезонски анализи за зимата 2025/2026 најавуваат дека почетокот на декември може да донесе поинтензивни студени периоди и обилен снег во голем дел од САД, Канада и Европа.
Според долгорочните модели, постои сериозна веројатност студените услови да продолжат и во јануари, особено доколку се реализира сценариото со стратосферско затоплување, кое знае да го наруши поларниот вртлог и да овозможи продор на арктички воздух кон пониските географски широчини.
Улогата на Ла Ниња во зимската циркулација
Главен климатски фактор оваа сезона ќе биде слабата Ла Ниња во Тихиот Океан. Овој феномен создава висок воздушен притисок над Северниот Пацифик и понизок над Канада, што го пренасочува поларниот млазен тек кон северот на САД. Таквата поставеност овозможува арктичкиот воздух да се спушта кон централните и источните делови на Северна Америка, а слична атмосфера може да се преслика и во Европа, особено во нејзините северни и централни држави.
Поларниот вртлог како клуч за сурови зимски услови
Еден од најважните елементи за изгледот на претстојната зима е поларниот вртлог – огромна маса од студен воздух која ротира околу Арктикот. Ако овој систем се ослаби или се распадне, студените воздушни маси многу полесно се спуштаат над Европа и Северна Америка, предизвикувајќи долги и снежни зими. Моделите нагласуваат дека такво пореметување е можно уште на стартот на зимата.
Декември: Поголеми шанси за снег на северот на Европа и Северна Америка
Декадните прогнози упатуваат на ниски температури и посилни снежни врнежи во североисточните делови на САД и Канада, но и во северните и делови од централните региони на Европа. Во САД се очекува засилен продор на студен воздух од Канада, а празничниот период би можел да донесе повторно “бел Божиќ” во неколку области.
Јануари и февруари: Студен почеток, потоа стабилизација
На почетокот на јануари, студениот бран би продолжил да ги зафаќа северните и источното крајбрежје на САД и Канада. Во Европа би биле можно засилени североисточни воздушни струења со пониски температури во голем дел од центарот и северот на континентот. Кон февруари се очекува постепено намалување на екстремниот студ, иако арктички влијанија сè уште би можеле повремено да предизвикаат нови заладувања.
Каква зима може да очекува Балканот?
Според моменталните анализи, зимата на Балканот би можела да започне со постудени периоди во декември, со зголемена веројатност за снег во планинските региони. Иако не е можно со сигурност да се предвидат обемите на врнежи, изгледно е дека почетокот на сезоната ќе биде од нормално до малку постудено за овој дел од годината.
Метеоролозите препорачуваат навремено следење на локалните прогнози и внимателна подготовка за можни снегови, особено во планинските делови на Босна и Херцеговина, Србија, Црна Гора, Северна Македонија и Косово, бидејќи првите зимски бранови често носат ненадејни промени во атмосферата.
