Во организација на Стопанската комора на Северна Македонија успешно се одржа првата обука на тема „Бизнис интегритет“ во Прилеп, која е дел од проектот „Граѓаните против корупцијата“, што се реализира со финансиска поддршка на американскиот народ преку Агенцијата на САД за меѓународен развој (УСАИД).
На обуката присуствуваа претставници од различни компании и индустрии од Прилеп и регионот, со цел да се запознаат со најдобрите практики и стратегии за деловен интегритет. Темите вклучуваа поставување на систем за интегритет, запознавање со релевантни меѓународни и европски регулативи, како и спроведување мерки за спречување и борба против корупцијата. Присутните имаа можност да разменат искуства и да разгледаат примери од реалната пракса кои ќе им помогнат во создавање етички деловен амбиент во своите компании. Во текот на обуката беа презентирани и алатки за спроведување на ефективни програми за деловна етика и интегритет, коишто им овозможуваат на компаниите да управуваат со ризиците и да воведат системи за спречување на корупција.
Сесиите беа водени од експерти од две македонски компании, Алкалоид АД Скопје и Македонски Телеком АД Скопје, кои веќе имаат значајно искуство во имплементација на системите за бизнис интегритет. На крајот на обуката, секоја компанија учесник доби сертификат за учество, како и електронски материјали со дополнителни информации за воведување систем за интегритет во компаниите.
Обуката во Прилеп е прва во серијата настани што Стопанската комора ги планира во наредниот период низ повеќе градови, со цел поттикнување на култура на интегритет во приватниот сектор. Овие активности се дел од пошироките заложби на Стопанската комора за развивање на деловната етика и промоција на бизнис интегритетот кои носат значителна корист за компаниите и создаваат конкурентна предност на пазарот. Компаниите кои применуваат принципи на интегритет и транспарентност не само што го зајакнуваат своето внатрешно работење, туку и ја зголемуваат својата доверба кај клиентите, партнерите и инвеститорите.
Воспоставувањето висок степен на деловен интегритет е од витално значење за целиот ланец со кои компаниите соработуваат, што придонесува за долгорочен успех и одржливост на нивното работење.
Програмата „Граѓаните против корупцијата“ е предводена од Македонскиот центар за меѓународна соработка, а Стопанската комора на Северна Македонија е еден од клучните партнери во проектот, со фокус на поттикнување култура на интегритет и корпоративна одговорност во приватниот сектор.
