Вкупното светско богатство порасна за 10,3 отсто во 2021 година на 473 трилиони долари, најмногу благодарение на подемот на берзата.
Ова го покажуваат податоците од студијата објавена во четвртокот од Boston Consulting Group (BCG).
Ова е најголем пораст во повеќе од една деценија, а бројот на супербогати, кои BCG ги дефинира како луѓе со имот вреден над 100 милиони долари, е зголемен за околу 300 луѓе.
Соединетите држави имаат најмногу супербогати луѓе, 25.800 луѓе. По нив е Кина, која има 8.500 супербогати луѓе. Германија е на третото место. Во светот, околу 69.000 супербогати поединци поседуваат 15 отсто од финансиските средства што можат да се инвестираат.
Вредноста на материјалните средства, вклучувајќи недвижен имот, уметност и злато, се зголеми за 11 отсто на 13 трилиони долари во 2021 година. Вредноста на недвижностите особено силно расте веќе некое време.
И покрај економските последици од војната во Украина, извештајот на BCG предвидува дека богатството ќе продолжи да расте ширум светот, а се очекува силен пораст, особено во Азија.
Доколку војната во Украина заврши оваа година, се очекува глобалното богатство да расте за 5,3 отсто годишно, а до 2026 година „новото богатство“ би можело да достигне 80 трилиони долари.
Студијата пресметала просечно зголемување од 5 проценти доколку војната продолжи и санкциите бидат поостри или траат подолго.
