Нови 30.000 дози вакцини против сезонски грип од француски производител се очекува од понеделник да бидат распределени до вакциналните пунктови низ Македонија. Здравствените власти апелираат граѓаните, особено повозрасните лица и хронично болните, навреме да се заштитат, бидејќи сезоната на респираторни инфекции веќе започнува.
Според министерот за здравство Сашо Клековски, со планираната дополнителна набавка на располагање ќе има вкупно 86.000 дози. Досега вакцина против сезонски грип примиле повеќе од 20.000 граѓани од ризичните категории, а се трошат преостанатите количини од првите 30.000 вакцини од јужнокорејско производство.
Последниот извештај на Институтот за јавно здравје покажува 112 пријавени случаи на грип и заболувања слични на грип во една недела, осум лабораториски потврдени случаи на грип и четири случаи на ковид. Епидемиолошкиот праг за почеток на сезонскиот бран сè уште не е достигнат, но лекарите потсетуваат дека за создавање заштита по вакцинацијата се потребни околу две недели.
