Во јужниот дел на Москва експлодирал автомобил во кој се наоѓал Сергеј Заворотни, поранешен портпарол и соработник на некогашниот украински премиер Микола Азаров. Според локалните известувања, Заворотни се здобил со тешки повреди и бил пренесен во болница.
Експлозијата се случила во населбата Чертаново, на улицата „Кировоградскаја“. Руските истражни органи потврдија дека е отворена истрага за случајот, додека медиумите објавија дека можно е во автомобилот да била поставена експлозивна направа.
Инцидентот се случува еден ден по друга експлозија на автомобил во Санкт Петербург, во која загинал припадник на руската армија. Засега не е утврдена поврзаност меѓу двата случаја, ниту е официјално утврдено кој стои зад нападот во Москва.
