Обединетото Кралство и Франција работат на формирање коалиција од земји за обезбедување на Ормускиот теснец, еден од клучните патишта за глобална трговија со нафта, изјавија денес британските одбранбени претставници, како што објави Би-Би-Си.
Лондон понуди да организира безбедносна конференција во Портсмут или Лондон во блиска иднина, на која би се развиле конкретни планови. Официјалните лица велат дека секоја мисија ќе бара учество на повеќе морнарици за да се обезбеди безбедноста на трговските бродови. Тие исто така нагласуваат дека секоја можна придружба на танкери би зависила од нивото на закана, кое во моментов е превисоко.
Плановите вклучуваат мултинационално решение со користење на конвенционални и автономни бродови за да се обезбеди безбеден премин и да се елиминира заканата од мини. Официјален претставник на одбраната рече дека верува оти извештаите за поставување мини се точни, но додаде дека водните патишта низ Ормускиот теснец остануваат отворени и дека мал број танкери сè уште минуваат низ нив, пренесуваат медиумите во регионот./Извор:Makfax
