Власта продолжува со судски прогон против малкуте медиуми кои не се наклонети на нејзина страна.
Вчера, Апелациониот суд во Скопје ја потврдил пресудата против уредникот на Цивил медиа, Џабир Дерала за текст преземен и објавен кога Христијан Мицкоски беше главен опозиционер.
Во изјава за јавноста, Дерала порачува дека оваа пресуда уште еднаш ја покажува длабоката испреплетеност меѓу политичката моќ и судството во земјата.
„Злоупотребата на институциите за замолчување на новинарите и активистите е белег на авторитаризам, а не на демократија. И покрај политичкиот притисок и обидите за заплашување преку исцрпувачки судски процес, останувам цврсто посветен на вистината, транспарентноста и демократските вредности. Овој случај не е само против мене лично – тој е напад врз секој што има храброст да ѝ се спротивстави на неправдата и да ја критикува власта“ вели Дерала.
Според него, ваквите постапки и во јавниот простор и преку институциите, се директен удар врз слободата на медиумите, слободата на изразување и правото на критика во едно демократско општество.
Дерала додава дека и покрај таквиот епилог, тој нема да биде замолчен.
„Замолчувањето на критичките гласови само ја продлабочува кризата на демократијата. Мојата решеност да ја бранам слободата на изразување, човековите права и демократските вредности е посилна од кога било“ вели Дерала.
