Германскиот министер за одбрана Борис Писториус го критикуваше телефонскиот разговор меѓу американскиот претседател Доналд Трамп и рускиот претседател Владимир Путин, нарекувајќи го „промашен“.
Писториус овие изјави ги даде во програма на ЗДФ. Руските напади врз украинската инфраструктура „не престанаа по овој наводно голем телефонски повик“, рече Писториус.
„Путин игра игра овде и сигурен сум дека американскиот претседател нема да може долго да остане пасивен“, рече тој. Писториус, исто така, изјави дека ќе дојде време кога Трамп „ќе реагира, ќе мора да реагира“ за да ја зачува „силата и престижот“ на САД.
Разговорот меѓу Трамп и Путин се одржа синоќа и не резултираше со целосен 30-дневен прекин на огнот, како што предложија Американците. Сепак, Путин се согласи на привремена пауза во нападите врз енергетската инфраструктура. На истото се согласи и Киев. Но, денеска веќе се случија напади од двете страни.
Германскиот министер Писториус рече дека е „грешка“ да се исклучи Европа од разговорите меѓу Трамп и Путин, бидејќи „на крајот, мирот, ако дојде, мора да биде обезбеден и на европско тло“.
Трамп го пофали разговорот со Путин како „многу добар и продуктивен“./Извор:Makfax
