„Веќе наредната недела изведувачот ќе почне да го расчистува објектот и да гради, затоа што ги имаме парите, ги обезбедивме и ги завршивме сите потребни процедури и крајно време е таму да започне работата. Но, ни крај памет на мене како министерка а верувам ниту на граѓаните не им беше дека за еден ваков проект, кој што навистина не треба да биде предмет на некакво препукување, ќе треба да молиме за целосна документација“ изјави министерката за култура, Бисера Костадиновска-Стојчевска.
Таа додаде дека помина интересен период во однос на примопредавањето на документацијата за реконструкцијата со Универзалана сала.
„Никој не претпоставуваше дека ќе молиме да ни се предаде целосната документација затоа што и нам, на Министерството за култура, ни следуваат рокови. Ги собравме сите релевантни документи по подолгиот и потешкиот пат“ рече Костадиновска Стојчевска.
Таа посочи дека останува уште да се потпише договорот за банкарска гаранција и веќе наредната недела изведувачот таму ќе почне со работа. Како што подвлече, процесот е затворен и ќе може да се почне со реконструкција.
