„Ние сме во исчекување да го видиме извештајот наредната недела на ЕК и планот за раст. Тоа сигурно ќе се дискутира во Собранието наредните денови и недели. Наша обврска останува донесувањето на уставните измени. Колку и да одлагаме и поместуваме по изборите, таа обврска ќе остане. Ние сметаме дека треба да се заврши што поскоро. Ќе работиме до последен ден во овој собраниски состав за обезбедување на 80 пратеници и мислам дека сите пратеници и политички партии треба да се свесни за одговорноста“, изјави вицепремиерот за европски прашања Бојан Маричиќ во „Студио 10“ на ТВ24.
Тој додаде дека во таа насока била и изјавата на претседателката Фон дер Лајен минатата недела кога го посети Скопје кога испратила јасна порака дека имаме перспектива да одиме напред, дека имаме добра основа за развој, планот за раст е во таа насока, скрининг процесот е при крај. Маричиќ дополнително посочи дека треба да ги изгласаме уставните измени за да може државата да продолжи напред.
„Наша задача како Влада, што сме ја преземале со гласање во собрание на францускиот предлог и во договор со ЕУ да ги спроведеме уставните амандмани. Содржински никој не ги оспорува, дури ни ВМРО-ДПМНЕ не ги оспорува. Ги оспоруваат само заради политички поени што скапо ќе ја чинат државата“, заклучи Маричиќ.
ПОПУЛАРНО НА ИНТЕРНЕТ...
