Денес, претседателот Џафери и Собранието на Република Северна Македонија беа домаќини на најдрагите гости, на децата на пратениците и на собраниските вработени.
Го придружуваа и потпретседателот Горан Мисовски и генералната секретарка Цветанка Иванова, а Дедо Мраз, како што впрочем е редот, со својата појава и автентична смеа, а најмногу со новогодишните пакетчиња, го заслади настанот уште повеќе.
Со овој денешен настан се продолжува веќе воспоставената практика на дружење на пратениците, вработените и најмладите во Кристалната сала и посета на дечињата во работните простории на своите родители.
Ова е убава можност за создавање нови пријателства, запознавање со работата на законодавниот дом и креирање една поинаква димензија помеѓу вработените.
Претседателот Џафери ги поздрави присутните и им посака добро здравје, многу среќа и успех во Новата 2023 година.
Навистина беше прекрасно искуство слушањето на веселиот џагор и смеа на драгите мали гости. Се гледаме в година пак!
