„Вистинската опасност за продолжување на европскиот пат на нашата држава доаѓа од една политичка партија, која што во својата програма се противи на ЕУ, на членство во НАТО, на интеграциите на нашата држава во Берлинскиот процес, во Отворен Балкан. Таа политичка партија е Левица и нејзиниот претседател Апасиев“ изјави премиерот Димитар Ковачевски на прес-конференцијата со неговиот албански колега, Еди Рама.
Тој додаде дека поголема е опасноста што таа партија го зема во заложништво претседателот на ВМРО-ДПМНЕ, Христијан Мицкоски, како и партијата ВМРО-ДПМНЕ затоа што Мицкоски е слаб, без став, без визија.
„Човек без став, визија и одлучност лесно може да биде земен во заложништво. Тоа се случува во моментов на македонската опозиција. Сметам дека на таков политички пироман, не смее да му се дозволи да го прекине европскиот пат на државата“ рече Ковачевски.
Премиерот додаде дека продолжувањето на европскиот пат на земјава зависи од нас, од пратениците во Собранието кои имаат одговорност пред своите деца, пред децата на нивните пријатели и роднини да донесат одлука со која ќе обезбедат иднина што значи членство во ЕУ.
