Министерката за одбрана Славјанка Петровска денеска во касарната „Гоце Делчев“ во Скопје се обрати на промоцијата на новите потпоручници во Армијата и свечената заклетва на новата класа питомци на Воената академија „Генерал Михаило Апостолски“.
Во своето обраќање Петровска подвлече дека професијата војник, подофицер или офицер во македонската Армија ја покажува љубовта кон татковината и решеноста секој да даде сопствен придонес во нејзиниот развој, безбедност и сигурност.
„Армијата на Република Северна Македонија е препознаена меѓу своите граѓани како институција која секогаш е подготвена да помогне и да одговори на сите предизвици, но истовремено и да даде свој придонес во одржување на мирот, безбедноста и стабилноста и надвор од границите на нашата држава“, истакна Петровска.
Упатувајќи честитки до новите офицери од кои девет се мажи, а девет жени, Петровска истакна дека од денес тие стануваат дел од организација чиј темел се стандардите, редот и дисциплината, организација во која работат искусни професионалци кои изминатите години дадоа несебичен придонес во развојот на Армијата, професионалци кои нè водеа на патот кон најголемиот воено-политички сојуз, НАТО – Алијансата.
„Благодарение на овие искусни луѓе се вршеа проценки и анализи, се изработуваа стратешки документи врз основ на кои се врши модернизацијата на Армијата. Се купува нова современа опрема и вооружување кои вам и на вашите колеги ќе ви бидат од големо значење за извршување на задачите. Но, една Армија не комплетна ако само се модернизира со опрема и вооружување. Вложувањето во секој еден од вас ја прави нашата Армија симбол на државноста“, потенцираше министерката.
Министерката Петровска осврнувајќи се на човечкиот капацитет кој е клучен за натамошен развој на одбраната, на новите 39 питомци кои денеска дадоа свечена заклетва, меѓу кои 31 се од Северна Македонија, шест се од Босна и Херцеговина и двајца од Црна Гора им порача дека на Воената академија ќе создадат тим на млади офицери кои ги поврзува нешто повеќе од униформата – почитта едни за други и ветувањето дека во иднина ќе направат се да ја гарантираат безбедноста и мирот во овој регион на кој сите припаѓаме.
„Со ентузијазам ве гледам како тим кој е подготвен да совладува секакви предизвици. Од денес секој од вас и се приклучува на Армијата. Внесувате нова енергија, прогресивни размислувања, но никогаш не заборавајте на влогот на поранешните и сегашни искусни припадници на Армијата. Кон нив гледајте со голема почит, затоа што тие се заслужни за ова што имаме денес“, рече министерката и додаде дека како министерка за одбрана нејзин приоритет е да обезбеди услови за нивна континуирана едукација и стручно усовршување.
Деканот на Воената академија, полковникот Митко Богдановски за ново промовираните потпоручници рече дека се идните лидери и идните промотори на државата и на Армијата, а на питомците им честиташе за определбата да го продолжат своето образование на Воената академија и им посака успех во текот на студиите.
На свеченоста, министерката Петровска и заменикот началник на Генералштабот, генералот Азим Нуредин и советникот за национална безбедност на Претседателот Стево Пендаровски, Блерим Кољали на тројцата прворангирани питомци, Кристијан Илиевски, Николина Пејовиќ и Сара Илиевска им врачија плакети за постигнатиот успех.
