„Ние сме земја којашто од сопственото искуство научи дека мирот, силата и напредокот доаѓаат со заедништвото – и кога воспоставивме независност по мирен пат во 1991-та година – и кога се издигнавме над внатрешниот меѓуетнички конфликт во 2001-та година – и денес, кога преку воспоставениот концепт „Едно општество за сите“, сме пример за функционална мултиетничка демократија, значаен фактор на стабилноста на Западен Балкан, а со тоа и на Европа и доверлив парнер на меѓународата демократска заедница“ рече премиерот Димитар Ковачевски во неговото обраќање на 77-мото Генерално собрание на Обединетите нации во Њујорк.
Тој додаде дека силата е во заедништвото и дека е потребно заедништво на демократскиот свет, сега и понатаму, во надминување на послеидиците од светски размери.
„Функционалните решенија на еден мал простор, секогаш се патоказ за решенијата на еден глобален простор. Предизвиците, колку и да ги има на едно широко географско тло, кулминираат на едно место, а потоа стануваат потенцијална глобална закана. Денес тоа место е една независна и суверена држава – Украина, чијшто народ се соочува со неприфатлива и недозволива агресија од Руската Федерација“ рече Ковачевски.
Премиерот истакна дека проблемите со кои се соочува светот се заеднички и дека пред нас се најтешката зима по Втората светска војна, обезбедување на храна и енергија за граѓаните и токму поради тоа и решенијата мора да бидат заеднички.
