Лидерот на опозициската ВМРО-ДПМНЕ, Христијан Мицкоски вечерва по состанокот на ИК, информираше дека партијата ќе собира потписи за задолжителен референдум против Договорот за добрососедство со Бугарија.
Во наредната недела партијата ќе собере 100 квалификувани потписи за референдум, што ќе се достави до Собранието.
-После тоа ВМРО-ДПМНЕ ќе пристапи кон собирање на 150 илјади потписи од граѓани. Прашањето ќе биде „Дали сте за напуштање на важноста на законот за ратификација за Договорот за добрососедство меѓу Македонија и Бугарија од 18.01.2018 година?“ ВМРО-ДПМНЕ ќе повика за гласање за поништување на овој Договор. Ова ќе биде одговор на народот, рече Мицкоски во обраќање пред седиштето на партијата.
Тој очекува сериозност и одговорност од власта.
-Формулирано е сериозно референдумско прашање. Очекуваме власта да ги прифати нашите аргументи „за“ за напуштање на важноста за законот за ратификација на Договорот за добрососедство. Гласаме „за“ или „против“ овој штетен договор, додаде Мицкоски.
Тој верува дека има луѓе во Владата кои размислуваат проевропски и нема да ги спречуваат граѓаните да гласаат на референдумот.
-Верувам дека има граѓан Албанци кои сочувствуваат со нашите проблеми и ќе ги поддржат нивните соседи Македонци кои се против асимилацијата, кажа Мицкоски.
Тодоров: ВМРО-ДПМНЕ да одговори зошто бара референдум за Договорот со Бугарија, а не и за тој со Грција
Немам комуникација со Мицкоски. Надвор сум од партиските структури. Функционирам како адвокат. Мислам дека донесов добра одлука, изјави денеска поранешниот министер и функционер Никола Тодоров околу тоа дали во моментов е партиски активен.
Според него, адвокатурата му овозможила малку повеќе да се посвети на семејството, но и да размисли за сѐ она што се случило во минатото и за сите негови одлуки.
Тодоров смета дека пред да се донесе одлуката околу евентуален референдум предложен од ВМРО-ДПМНЕ, од партијата треба да одговорат на неколку прашања.
-Пред сѐ, јас сум секогаш за референдум. Како демократ, секогаш сум за тоа. Мислам дека вечерва кога ќе дискутираат на Извршниот комитет, од партијата треба да одговорат како ќе им одговорат на најтврдокорните „зошто се расправа за референдум за Договорот со Бугарија, а не за Договорот со Грција“. Може и тоа прашање, на кое треба да имаат договор. Второ прашање што доколку референдумот не успее и дали има изгледи дека ќе успее. Трето прашање на кое треба да одговорат во однос на Албанците. Може да дојде до поделба бидејќи не верувам дека има Албанец кој ќе гласа „за“ на референдумот и поништување на Договорот со Бугарија и како ќе се одрази на идниот коалициски капацитет на партијата. Се плашам дека доколку референдумот не успее, СДСМ ќе протоколкува како мнозинството граѓани одлучиле дека Договорот е прифатлив и тоа може да му направи проблем на ВМРО-ДПМНЕ на следните избори, вели Тодоров во емисијата „Жешко политичко лето“.
