Претседателот Стево Пендаровски, денес и утре, ќе престојува во дводневна официјална посета на Црна Гора.
Во Подгорица, денеска, претседателот Пендаровски со највисоки државни и воени почести ќе биде пречекан од претседателот на Црна Гора, Мило Ѓукановиќ, по што ќе се одржат тет-а-тет средба меѓу двајцата претседатели, пленарен состанок на делегациите на Република Северна Македонија и Црна Гора и заедничка прес-конференција на двајцата претседатели.
Во рамките на посетата претседателот Пендаровски ќе оствари средби со Здравко Кривокапиќ, претседател на владата на Република Црна Гора, и со Дритан Абазовиќ, потпретседател на владата и мандатар за состав на нова влада на Црна Гора.
Утре, во Бар ќе се одржи свечена церемонија, на која претседателот Пендаровски ќе му ја предаде спомен-плочата на Владимир и Косара на црногорскиот претседател Ѓукановиќ во знак на силното пријателство и културно-историската врска меѓу Северна Македонија и Црна Гора.
