Арсовска со укинувањето на бесплатниот превоз и мерките против загадувањето за еден ден, покажува неспособност и аматеризам, реагира СДСМ.
Партијата прашува дали градоначалничката Арсовска смета дека со мерка која трае 1 ден го решила аерозагадувањето во главниот град.
„Нема друго логично објаснување зошто Данела ги укинува мерките за спречување на загадувањето на воздухот во Скопје, а нема ниту дополнителни мерки. Арсовска за три пати го намали буџетот за Секторот за животна средина, ги намали и средствата за субвенционирање на трошоците за набавка на инвертори. Исто така ги укинува и девалвира добрите еколошки проекти воведени од градоначалникот на СДСМ Петре Шилегов“, велат од СДСМ.
Со ваквиот пристап, како што додава партијата, Арсовска не го решава проблемот со загадувањето на воздухот во главниот град, нема ниту знаење ниту способност за тоа и покажува неспособност и аматеризам.
