Министерот за транспорт и врски Благој Бочварски претстојува во дводневна посета во Брдо кај Крањ, Словенија, каде учествува на Министерскиот совет во рамките на Транспортната заедница.
На Министерскиот совет покрај министерот Бочварски, присуствуваа и министрите за транспорт на земјите од регионот, потписнички на Договорот за транспортна заедница, Република Албанија, Босна и Херцеговина, Република Косово, Република Србија и Република Црна Гора, како и претставници на Секретаријатот на Транспортната заедница и Европската комисија.
Тема на разговорите на Советот беа состојбите во транспортниот сектор во регионот, идните планирани активности, можноста за прошрување на концептот „зелени коридори“ заради олеснување на транспортот со соседните земји членки на Европската Унија и безбедноста на патиштата.
Во своето обраќање министерот Бочварски го истакна примерот со т.н. зелени коридори кои беа воведени за време на падемијата како успешен пример за брзиот транспорт на стока и медицински материјали се со цел избегнување на тесните грла на границите.
“Иницијативата за зелените коридори, промовирана во регионот на Западен Балкан за време на здравствената криза, како привремен и брз одговор на тековната здравствена вонредна состојба, имаше за цел спречување на недостиг на неопходна стока и медицинска опрема. Оваа иницијатива се покажа како еден од најуспешните примери за регионална соработка. Нејзиното главно достигнување за зачувување на трговските текови во регионот, не само што имаше значителни економски придобивки, туку се покажа многу практично во однос на решавањето на итните потреби на населението во време на пандемијата“, истакна министерот Бочварски.
Во рамките на своите заложби, потенцираше министерот Бочварски, Владата активно работи на формирање на Агенција за безбедност која ќе има цел зголемување на нивото на безбедност во транспортот преку воспоставување сигурен и безбеден транспортен систем за сите корисници.
Покрај овие теми на Министерскиот совет се дискутираше за новата Стратегија за одржлива и паметна мобилност од перспектива на Западен Балкан како и ажурирање на листата на европското законодавството и нивно прилагодување во членките на Транспортната заедница.
Во рамки на Министерсткиот совет, министерот Бочварски одржа билатерална средба со министерот за инфраструктура на Република Косово, Либурн Алиу. На средбата се разговараше за одвивањето на меѓународниот патен транспорт меѓу двете земји. Исто така, двајцата министри разменија информации во однос на изградбата на автопатот Скопје-Блаце, како и плановите во однос на изградба на заедничка железничка гранична станица, информираат од кабинетот на Бочварски.
Во текот на утрешниот ден министерот Бочварски ќе учествува на Министерскиот состанок за прекугранично поврзување на земјите од регионот на Западен Балкан во рамки на словенечкото претседателство со Советот на Европската Унија.
