„Обвинителството и судството се независни од извршната и од парламентарната власт. Дали се независни од корупција, адвокати, одредени моќници, тоа треба да го покажат истрагите“ кажа премиерот Зоран Заев во неговото интервју за „Фокус“.
„Едно знам, оваа извршна власт ниту влијае врз судот, ниту и паѓа на памет такво нешто. Јас водев своевидна револуција против такви премиери и министри кои се јавуваа на судии и обвинители. Не смее никому да му падне на памет да се јави и да диктира пресуди, обвиненија“ кажа Заев.
Премиерот додаде дека нема инсталирање на свои луѓе во судството и политички определени и дека сите назначувања се спроведуваат според закон.
„Ќе повторам. Не ни паѓа на памет такво нешто. Нема инсталирање на свои луѓе во судството и политички определени. Таму каде што е така дефинирано во законот, се избираат и со политички одлуки. Таму каде што не е предвидено, се знае како е според закон. Судиите се избираат преку Судскиот совет, а обвинителите преку Советот на обвинители. Парламентот само поставува членови на Судскиот совет и на Уставниот суд.“- објасни Заев.
