Министерството за труд и социјална политика до сите министерства го достави изготвениот план околу владината одлука – недела да биде неработен ден за сите граѓани. Министерката Јагода Шахпаска, вели дека ги очекува нивните мислења и сугестии.
Според неа, тие ќе имаат рок од седум дена да ги подготват нивните мислења и да ги достават во Влада на усвојување.
Сепак, мора да се обезбеди непречено функционирање на витално важните функции на државата, тоа значи 24-часовна покриеност на оние дејности кои им се неопходни на државата како: здравство, полиција, противпожарните служби, комуналните служби кои се под ингеренции на општините и останати.
Инаку, иницијативата недела – неработен ден, која треба да биде преточена во законско решение е со цел недела да биде ден за семејството, во насока на негување на традиционалните вредности.
