Во недела се очекува Комисијата за заразни болести да излезе со предлог за тоа како да се дејствува понатаму со оглед на поголемиот број новозаразени и дали ќе биде потребно враќање на полицискиот час.
Според неофицијални информации полициски час од понеделник најверојатно ќе нема, но ќе зајакнат контролите за почитувањето на мерките за заштита од коронавирус, а тоа е носење на маски на места каде што не може да се оддржи физичка дистанца, но и во затворените простори.
Согласно новите бројки што ќе доаѓаат следните денови ќе се оди кон продолжување на олабавувањето на мерките и применување на нови протоколи за отворање на сега затворените бизниси.
Министерот Венко Филипче вчера ја смири јавноста, со информацијата дека вирусот сега е помалку вирулентен и во 90 проценти од случаите е забележан без симптоми, а останатиот дел од новозаразените имаат благи симптоми, што на пример не беше случај во март и април.
Комисијата за заразни болести во следниов период ќе треба да даде мислење и за оддржување на парламентарните избори кои треба да се случат на 5-ти јули. Многу земји објавија дека ќе имаат избори, како на пример Србија, Хрватска, Словенија, но и Русија која ќе гласа на референдум. Мислењата на здравствените власти во овие земји се дека со коронавирусот ќе живееме и во следниот период, се до пронаоѓањето на вакцина, па според тоа, ќе мора и да ги практикуваме заштитните мерки и во иднина, но и да си го вратиме нормалниот живот, како и нормално функционирање на институциите, особено треба да се земе и фактот што како држава мора да имаме Влада со парламент позади неа, кои ќе мора да носат одлуки во случај на есенски бран на коронавирусот.
