Хрватското гратче Света Недела воведува нови стандарди за транспарентност во плаќањето на јавните службеници каде жителите го оценуваат работењето на вработените во градската администрација, а од таа оценка ќе зависи нивната плата.
Вработените во градската администрација ќе добиваат фиксен и варијабилен дел, а платите ќе им се намалат за 10 проценти. Во зависност од добиената оценка, ќе им бидат исплатени квартални бонуси, појасни заменик-градоначалникот Давор Наџи.
Ваквата политика подразбира службениците со најлоша оценка да не добијат награда, а на подобрите да им биде зголемена платата.
Освен тоа, евалуација ќе се прави и во рамки на целото раководство, што ќе се земе предвид при целокупната проценка на вработените.
Ова е наш следен чекор за подобро управување со градот, изјави Наџи.
Предлогот за намалување на фиксните плати на вработените допрва треба да го одобри Градскиот совет, а доколку се донесе позитивна одлука, проценката ќе започне од февруари или март следната година.
