Министерот за надворешни работи, Никола Димитров, објави демант на информација објавена на порталот „Експрес“.
„ДЕМАНТ до порталот expres.mk
Почитувани,
Во текстот со наслов „Посебниот случај на Никола Димитров“ објавен на 19.02.2020, вашиот медиум преку грубо кршење на новинарските стандарди, без да бидам побаран за став, објави ноторна лага за информација што е многу лесно проверлива.
Вашиот непотпишан новинар, со малициозно пренесување на мој фејсбук статус, во кој саркастично потсетувам дека ден по Референдумот, се објави лажна вест за моја наводна оставка, со фалсификуван документ, печат и потпис, тврди дека за тој случај јас никогаш не сум побарал истрага.
Вистината е дека јас не само што јавно повикав да се истражи случајот и да се лоцира одговорност, туку тоа беше направено и преку официјално барање до Јавното Обвинителство, уште следниот ден, веднаш по објавувањето на фалсификатот, на 02.10.2018 година.
Овој податок е јавен и е лесно проверлив, и навистина изненадува непрофесионалноста што пред да се објави текстот, редакцијата не се обратила ниту до мене, а очигледно ниту до Обвинителството.
Текстот којшто патем скандалозно ги дели медиумите на такви кои се „блиски до СДСМ“ и оние кои тоа не се, понатаму се повикува на статус од социјалните мрежи, што ме споредува со Коте од Руља. Кога ме споредувате мене со Коте, ги изедначувате ЕУ и НАТО со Каравангелис. Појасен (и можеби фројдовски) израз на определбата на авторите на овие споредби за македонската евроатланска интеграција не може да се замисли.
Во согласност со новинарските начела и основното право на „втората страна“ да биде консултирана, а особено во насока на вистинско информирање на граѓаните, наместо пласирање на неточни информации, од вас очекувам овој демант да биде објавен во целост, и се разбира, да ја повлечете лагата.
Извинување не мора.
Со почит,
Никола Димитров“ – напиша Димитров на Фејсбук.
