Ви го пренесуваме во целост обраќањето на вицепремиерот за економски прашања д-р Кочо Анѓушев на свеченоста за потпишување на договор за државна помош со Чешката компанија Локо Транс која во нашата земја ќе инвестира од 15 до 20 милиони евра и ќе отвори нови 250 до 300 нови работни места во Скопје:
– Ми претставува чест и задоволство денеска да објавиме уште еден договор за државна помош којшто ќе биде потпишан со чешката компанија Локо Транс, којашто е компанија во делот на железничкиот транспорт односно на произведување на шински возила. Таа работи во машинската индустрија, високо софистицирана индустрија којашто во својата производна програма има производство на железнички вагони и локомотиви.
Тие имаат капацитети во повеќе држави, во Чешка, Словачка, Италија, Бугарија, Србија, Аргентина и ги покриваат пазарите на Европа, на Блискиот Исток, на Азија, на Латинска Америка и на Африка.
Фабриката којашто ќе биде изградена во нашата држава ќе биде инвестиција помеѓу 15 и 20 милиони евра. Ќе се произведуваат транспортни шински возила, вагони. Тоа е многу слична фабрика, но многу пософистицирана на она што беше Колска во Велес на времето и мислам дека е добро да напоменеме дека и еден добар дел од вработените коишто ќе имаат желба да работат во новата фабрика од Колска и нивниот проблем ќе биде решен на овој начин, сите тие коишто ќе имаат капацитет и желба да продолжат со работењето во новата компанија Локо Транс ќе бидат преземени и ќе имаат можност својот работен век да го поминат во оваа компанија, бидејќи таа е компанија којашто ќе произведува шински возила за целиот свет.
Планирани се 250-300 нови работни места. Фабриката се очекува да биде завршена во периодот од почетокот на градба за некои 12-15 месеци и потоа да започне производниот процес. Производниот процес ќе биде комплетен, од почеток од репро материјали, па се до готов производ ќе се одвива во рамките на оваа фабрика.
Договорот за државна помош се потпишува согласно законот во нашата држава, согласно законот за финансиска поддршка којшто беше донесен во мај 2018 година и има транспарентни критериуми и мерките и поддршката што компанијата ги добива од страна на државата се согласно овој закон и исто како и сите останати странски инвеститори и домашни инвеститори во нашата држава.
Ја користам приликата на компанијата Локо Транс да и посакам успешна имплементација на проектот, да се надеваме дека ќе биде се завршено во најдобар начин и во рокот кој тие го предвидуваат и да се надеваме дека ќе биде тоа еден сериозен и значителен придонес, дополнителен во нашата економија и за растот на индустријата и на индустриското производство во нашата држава којшто последните години бележи значителен раст.
