Иако зависноста од купување е одамна призната, таа денес има прилично поинакво значење и обем.
Сега, ваквата зависност погодува едно од дваесет лица, пишува „Дејли мејл“. Последните истражувања покажуваат дека уживањето во трошење пари преку интернет може да доведе до непотребно трупање на предмети, влегување во долгови, како и губење на самоконтролата и чести расправии со најблиските.
„Навистина е време прекумерното купување на интернет да се препознае како закана по менталното здравје и ментално нарушување, односно луѓето да се едуцираат за сите негативни аспекти“, смета докторката Астрид Милер.
Во истражување кое таа го спровела со нејзиниот тим, учествувале 122 лица при што се дошло до заклучок дека зависниците од купување преку интернет почесто страдаат од депресија и анксиозност.
Резултатите од ова истражување се објавени во списанието „Сеопфатна психологија“, а експертите се надеваат дека нивната работа ќе инспирира и други да ја истражуваат оваа појава.
Тие исто така имаат објаснување зошто овој феномен се јавува сè почесто.
„Импулсивното купување се должи на надворешните фактори како што се онлајн распродажби или убави реклами“, објаснува финансиската советничка, Кери Ратл.
Покрај тоа, луѓето се привлечени и од зголемениот број на платформи за онлајн продажба, сè попристапните апликации за купување, како и испораката на производите до врата.
Поради сето ова, велат експертите, расте бројот на млади луѓе кои стануваат зависници./Makfax
