По светската премиера на Филмскиот фестивал во Рим, филмот „Врба“ и Милчо Манчевски се враќаат дома. За денеска е закажана премиера на филмот во Македонска филхармонија, а во исто време ќе се прикажува во „Синеплекс“ и „Милениум“, како и во Битола, Штип, Охрид, а во неделите што следуваат филмот ќе биде на редовниот репертоар во овие киносали.
Филмот има машка и женска верзија. Манчевски за тоа вели: „Не се разликуваат многу, ама едната е подинамична, а другата подлабока. И двете се еднакво интересни – секоја на свој начин. Женската верзија ќе се прикажува во ‘Синеплекс’, а машката во ‘Милениум’“.
Во Прилеп прикажувањето ќе почне од 4 ноември.
Манчевски вели дека „Врба“ е трагедија со среќен крај. „Има и тажни моменти, ама и многу хумор и радост – како и животот“, рече Манчевски.
