Од специјалното јавно обвинителство (СЈО) информираат дека сè уште немаат добиено писмен допис од страна на Јавното обвинителство врз основа на кое би можеле да објаснат дали и како ќе се постапува со предметите на СЈО.
„Сакаме уште еднаш да ја изразиме нашата загриженост поради фактот што до овој момент ниту е избран јавен обвинител кој ќе ја замени Јанева, ниту, пак, е донесено ново законско решение со коешто ќе се регулира статусот на ова Јавно обвинителство“, се наведува во соопштението на СЈО во кое се додава дека мандатот на ова обвинителство е до 15 септември 2020 година, до кога ќе продолжат работниот однос на вработените и тековните обврски.
Од таму сметаат дека на вработените во институцијата им се закануваат проблеми во однос на работниот однос, а постои и опасност во однос на материјалите со кои располага обвинителство.
„Отсуството на регулатива за тоа што ќе се случува со вработените, тековните обврски, архивата и материјалите со кои располага обвинителството, во ситуација кога нема раководно лице на институцијата, ќе доведе до реални проблеми во остварувањето на правата од работен однос на вработените лица и намирување на обврските на институцијата, а воедно ќе отсуствува и контрола на спроведувањето на безбедносните процедури поврзани со сите материјали со кои располага обвинителството“, се посочува во соопштението.
