ВМРО-ДПМНЕ побара од Обвинителството да поведе кривична постапка против Горан Сугарески и Миле Талески поради видеото, во кое, како што велат од ВМРО, двајцата барале од вработени во државната администрација како надомест за нивното вработување да агитираат за претседателската кампања на Пендаровски.
„ЈО треба веднаш да постапи по допрен глас и да поведе кривична постапка. Очекуваме ЈО да поведе постапка во согласност со законот и да поднесе кривична пријава против Сугарески во согласност со чл. 353 од КЗ. Дополнително, ја повикуваме антикорупциската да постапи во согласност со чл. 40 од Законот за спречување на корупцијата и судир на интересите, кој јасно забранува на лица што вршат државни функции да влијаат при вработувања. Доколку институциите ја немаат слушнато аудиоснимката, ние го испраќаме линкот од неа, која е објавена на ‘Јутјуб’“, велат од ВМРО-ДПМНЕ.
Опозицијата додава дека доколку институциите не се охрабрат и не поведат постапки против Сугарески и Талески, против нив ќе бидат поведени постапки со враќањето на правната држава во Македонија.
