Претседателот на Владата, Зоран Заев, заедно со вицепремиерот и министер за внатрешни работи, Оливер Спасовски, беше во посета на општина Шуто Оризари, каде што се сретна со градоначалникот Курто Дудуш, а потоа заедно со пратеникот Самка Ибраимовски се упати во обиколка и разгледување на дел од населбата каде што со помош на приватни донации се поплочени 6 земјени улици и се решени инфраструктурни прашања од интерес на граѓаните.
„Денеска сме овде на дело да видиме практична реализација на 6 улици, кои беа далеку под стандардите благодарение на фирми донатори, под раководство на пратеникот Самка Ибраимовски. Деца одеа во кал додека одеа и се враќаа од училиште. Денеска тоа е решено, 6 улици се поплочени“, рече Заев.
Тој соопшти дека Општината Шуто Оризари има поднесено апликација за поставување атмосферска канализација во овој дел од населбата во текот на летото, информира дека во мај се очекува отворање на првата полициска станица во Шуто Оризари и најави и дека ќе се отворат и детска градинка и спортска сала.
„Драго ми е што во фокусот, покрај растот и развојот на државата, вниманието ни е насочено и кон најсиромашните. Кон оние на кои им е потребна и неопходна инфраструктура и за чија реализација работиме сите ние заедно. Во 2018 година реализиравме од државните пари големи инфраструктурни проекти во 11 општини каде што живеат Роми. Во Шуто Оризари две улици се дел од таа реализација, едната е ‘Виетнамска’, другата е ‘Волт Дизни’. Едниот проект е 800.000 денари, другиот е 1 милион и 400 илјади денари. Такви проекти се реализираа и во Битола, Штип, Кочани и во другите општини. Оваа година за комунална инфраструктура имаме нови 20 милиони денари“, истакна премиерот Заев и испрати апел до сите деловни луѓе и бизнисмени да продолжат да помагаат во унапредување на квалитетот на инфраструктурата за подобри услови за граѓаните од Шуто Оризари, како и во другите општини со ромско население.
