Во текот на изминатото деноноќие, во периодот од 7 часот на 5.8.2021 до 7 часот денеска, 6.8.2021, во активностите за гаснење и превенирање на пожарите на територијата на Република Северна Македонија од страна на МВР беа ангажирани околу 450 полициски службеници, како и 165 мотопатроли и 148 возила.
Во текот на посочениот период, во непосредна близина на пожарот кај месноста Стара Депонија во Штип, бил затекнат С. Г. (57) од Штип со патничко возило „опел астра“, во кое при контрола се пронајдени изгорени пружини за кои појаснил дека ги палел за да ги продаде како отпадно железо. Известен е јавен обвинител, а по комплетирање на материјалот, ќе следува соодветен поднесок.
На 5.8.2021 во 20.10 часот, на репетиторот на Водно, од страна на полициска патрола, се затекнати три лица што се движеле во шумскиот појас и тие биле задржани во полициска станица по што против нив е поднесена соодветна пријава.
МВР апелира строго да се почитува забраната за движење во шумските предели, граѓаните максимално да се воздржат од палење огнови, отпадоци, меѓи и стрништа на нивите, да не се фрлаат неизгаснати догорчиња и да не оставаат стаклени шишиња или други предмети, кои се подолго време изложени на сонце и може да предизвикаат пожар. Неопходна е максимална будност и целосно одговорно однесување на секој поединец, апелираат од МВР.
