Одбраната на бизнисменот Јордан Камчев, кој е во притвор за обвинението „Плацеви на Водно“, објави реакција во која наведува дека судот врз него врши репресија и тортура, а дека тој е со влошена здравствена состојба. Како што велат во реакцијата, судот не прифаќа да го замени неговиот затворски притвор со домашен и покрај тоа што Вишото јавно обвинителство пред два дена ја прифатило гаранцијата што бизнисменот ја понудил.
Оттаму додаваат дека по четири месеци ефективен притвор Камчев бил со видливо влошена здравствена состојба која продолжувала да се влошува поради несоодветни медицински и санитарни услови во КПУ Затвор Скопје.
„ По неговото последно влошување на состојбата додека ја издржува мерката притвор и неговата хоспитализација на Клиниката за кардиологија, со оглед на ситуацијата, постои голема загриженост за сериозен ризик по неговото здравје, се вели во реакцијата.
Исто така се додава дека јавното обвинителство е овласатен предлагач на мерките за безбедност и дека според досегашната судска пракса на кривични постапки, судот секогаш ги засновал своите одлуки за определување на мерки според предлозите од јавното обвинителство.
„ Оттука целосно небулозно е ваквото постапување на судот кое не соодејствува со законски определената улога на судот во кривичната постапка па поради тоа се отвора и прашањето за незавиност и непристрасност на судот во случајот со г-динот Камчев“ посочуваат адвокатите на Камчев.
Камчев е во притвор од 14 март и треба на 16 јули да седне на обвинителна клупа во Основниот суд Скопје 1 за обвинението познато во јавноста како „Плацеви на Водно“. За тој случај обвинети се и поранешниот премиер Никола Груевски, неговиот кум Ристо Новачевски, поранешниот директор на УБК Сашо Мијалков, мајката на Камчев, Ратка Камчева и Ненад Јосифовиќ.
Камчев во март беше приведен откако беше издадена сомнителна белешка од безбедносните органи, што е спротивно на законот.
