Главниот град на Словенија започна тестирање необично возило за јавен превоз, кое по изглед наликува на трамвај, но се движи по обични улици без железнички шини. Новиот систем е базиран на електричен автобуски превоз со голем капацитет и засега се испробува без патници.
Возилото е произведено од кинеската компанија CRRC и може да превезува приближно 250 патници. Првото пробно возење било организирано на релацијата од населбата Шишка до центарот на Љубљана и назад, со полициска придружба.
Цената на едно возило надминува два милиони евра, а тестирањето е планирано да трае околу еден месец. За редовна употреба ќе бидат потребни и законски измени, бидејќи сегашните прописи ја ограничуваат должината на автобусите на 18 метри. Градските власти го разгледуваат воведувањето на ваков систем во следните неколку години.


