Монтреал е прогласен за најбезбедниот град во светот за патување во 2027 година, според нова студија на осигурителната компанија „Berkshire Hathaway Travel Protection“.
Меѓу 15-те најдобро рангирани градови, дури девет се европски, а највисоките позиции меѓу нив ги заземаат Цирих и Амстердам.
Анкетата опфати 38 популарни домашни и меѓународни дестинации меѓу американските патници. Повеќе од 1.500 испитаници ја оценија безбедноста на градовите што лично ги посетиле, а нивните одговори беа споредени со податоците за безбедноста на платформата „Numbeo“, списанието „The Economist“ и организацијата „GeoSure Global“.
Авторите забележуваат дека резултатите се базираат на безбедносните услови од август 2026 година и не мора да ја одразуваат моменталната состојба.
Канадскиот Монтреал освои 82,18 поени и го освои првото место, откако беше само 16-ти година претходно. Неговата главна предност е ниската стапка на криминал, додека најголемиот проблем за посетителите се сообраќајните метежи, особено на мостовите над реката, пишува „Euronews“.
На второто место е Цирих со 81,03 поени, што е подобро за една позиција во споредба со претходната година. Според авторите на истражувањето, високите цени, поконзервативниот карактер на градот, како и чистиот и безбеден јавен превоз придонесуваат за неговата безбедност.
Третото место му припадна на Амстердам со 80,81 поени. Холандскиот главен град се искачи од четвртото место, а истражувањето го опишува како изненадувачки безбедна дестинација и покрај големиот број туристи.
Девет европски градови меѓу 15-те најбезбедни
Меѓу најдобро рангираните европски градови е Рејкјавик, кој го освои петтото место со 78,90 поени. Исландскиот главен град беше на самиот врв на листата минатата година.
На листата се наоѓаат и Осло на шестото место, Венеција на осмото место, Даблин на 11-то место, Копенхаген на 12-то место, Барселона на 13-то место и Париз на 15-то место.
Листа на 15 најбезбедни градови за патување во 2027 година
Монтреал, Канада
Цирих, Швајцарија
Амстердам, Холандија
Токио, Јапонија
Рејкјавик, Исланд
Осло, Норвешка
Сингапур, Сингапур
Венеција, Италија
Сиднеј, Австралија
Хонолулу, Хаваи, САД
Даблин, Ирска
Копенхаген, Данска
Барселона, Шпанија
Сан Франциско, САД
Париз, Франција
Иако европските градови доминираат на листата, првото место ѝ припадна на Канада, додека три азиско-пацифички дестинации – Токио, Сингапур и Сиднеј – беа меѓу 15-те најбезбедни./Извор:Makfax
