Рускиот претседател Владимир Путин би прифатил директен телефонски разговор со украинскиот претседател Володимир Зеленски доколку поканата дојде од Киев, изјави Јуриј Ушаков, советник за надворешна политика на Кремљ.
Во разговор за руската државна телевизија „Вести“, Ушаков истакна дека рускиот лидер никогаш не одбил директни разговори со шефовите на други држави.
„Мислам дека, секако, би стапил во контакт. Путин никогаш не одбил разговори“, рече Ушаков, одговарајќи на прашањето дали може да има директна комуникација меѓу двајцата претседатели.
Неговата изјава следеше откако украинскиот министер за надворешни работи Андриј Сибиха потврди дека Зеленски е подготвен за директни преговори со Путин на највисоко ниво, со цел да се разговара за најчувствителните и најтешките прашања од конфликтот, првенствено територијалното прашање.
Сибиха нагласи дека Украина смета дека директната средба меѓу Зеленски и Путин е важен услов за надминување на дипломатскиот ќорсокак и постигнување конкретен напредок во преговорите за завршување на војната.
„Ние ја сакаме таа средба и сме подготвени за неа. Веројатно само средба меѓу Зеленски и Путин може да им даде ново значење на преговорите. Зеленски е подготвен да разговара за најтешките и најчувствителните прашања, особено за територијалното прашање“, додаде Сибиха.
Шефот на украинската дипломатија истакна дека делегациите на пониско ниво можат да разговараат за технички прашања, како што се мерки за градење доверба, размена на затвореници и заштита на цивили, но дека сеопфатните политички решенија во врска со суверенитетот и државните граници бараат директно ангажирање на шефовите на држави.
Киев претходно изјави дека е подготвен да разгледа практични решенија, вклучително и замрзнување на активната фронтова линија за да се запрат борбите и жртвите.
Сепак, украинските власти нагласуваат дека нема законски да отстапат територија ниту формално да ја признаат руската власт над областите под руска контрола./Извор:Makfax
