Американскиот претседател Доналд Трамп изјави дека не е сигурен дали би соработувал со некој друг израелски премиер, доколку Бенјамин Нетанјаху ги загуби парламентарните избори на 27 октомври. Во краток телефонски разговор со „Аксиос“ во неделата, тој ја објасни својата одлука да му даде поддршка на Нетанјаху само девет дена пред изборите, иако односите меѓу двајцата лидери станаа сè позатегнати во последните месеци.
„Можеби ќе соработувам, можеби не. Кој сака да ризикува?“, одговори Трамп на прашањето дали би можел да соработува со друг израелски лидер. Тој додаде дека има добри односи со Нетанјаху и верува дека успешно ќе продолжат да соработуваат доколку тој остане премиер. „Важно е Израел да има некој на кого може да се потпре“, рече тој.
„Не сакав да му дадам поддршка прерано“
Трамп откри дека веќе некое време планирал јавно да го поддржи Нетанјаху.
„Секогаш имав намера да го направам тоа. Само не сакав да го сторам тоа прерано“, изјави тој за „Аксиос“.
Во објава на платформата Truth Social во неделата, тој го опиша Нетанјаху како „голем премиер-воин“ и клучен американски партнер во борбата против Иран. Тој наведе дека, без него, САД би морале сами да се справат со прашањето за Иран – нешто што тој не го посакува – и му понуди „целосна и безусловна поддршка“./Извор:Makfax
