Едно лице загина, а осуммина се повредени во рускиот ракетен напад врз украинскиот главен град Киев во текот на ноќта. Според украинската Државна служба за вонредни состојби, балистичките ракети предизвикале оштетувања во најмалку три градски реони. Во реонот Десњански бил погоден трикатен нестанбен објект, каде што избувнал пожар, а оштетени биле и автомобили паркирани во близина. На друга локација била оштетена и метро-станица.
Во реонот Соломјански пожар избувнал во медицински објект сместен во станбена зграда со 25 ката, додека во Днипровски бил оштетен образовен објект. Украинските спасувачи интервенирале на повеќе локации, додека надлежните служби ја проценуваат материјалната штета. Новиот напад повторно го става во центарот на вниманието ризикот за цивилното население и инфраструктурата на Киев, каде што жителите и понатаму се соочуваат со опасност од воздушни напади.
