Најмалку 57 припадници на безбедносните сили загинаа во средата во два напада извршени од огранок на џихадистичката група „Исламска држава“ што дејствува во регионот Сахел, соопшти во четвртокот Министерството за одбрана на Нигер.
Напад врз воена база во Тахуа
Според извештајот на Министерството, 38 војници загинале во првиот напад врз воената база „Дабагу“ во регионот Тахуа, додека неколку други се водат како исчезнати.
Регионот Тахуа се наоѓа на околу 450 километри од главниот град Ниамеј, во близина на границата со Мали.
Втор напад во близина на Абала-Филингве
Во вториот напад, кој се случил истиот ден во областа Абала-Филингве – на околу 250 километри од Ниамеј – загинале 19 припадници на жандармеријата.
Нестабилност и незадоволство во војската
Воената хунта, која ја презеде власта по пучот во 2023 година, се соочува со тешкотии во обидот да го стави под контрола долготрајниот конфликт со џихадистичките групи во земјата.
Според извештаите, расте незадоволството во војската поради големите загуби во битките против исламистичките групи; во август се случи и обид за бунт, кој хунтата успеа да го задуши по неколку часа./Извор:Makfax
